VIVLIUTECA ARMÂNEASCÂ DIGITALĂ

Dzâ-ńi bre gione, dzã-ńi, ți-i pi la armâńi
Cum bâneadzâ a noșțâ pâpâńi
Dorŭ di ei mi luo, tu-aestu chiro
Nu știi ți greu diparti s-armâńi

Yinŭ sâ-ńi ti vedŭ, di-acasâ s-ti ntrebŭ
Ți adraț voi, cum hiț, pri iu bânaț
Yinŭ sâ-ńi ti vedu, pi tini s-pitrecu
Ncľinâciuni la vruțľi a mei fârtaț

Gione ta s-nu crepŭ, la tini mi-angrecŭ
S-nedz acasâ, la a mei s-lâ dzâț
Ma-acâțai di fudzii tu ermi xeani
Sâ-ńi mi ľeartâ, s-nu hibâ cârtiț

Zboarali chirui, cântițli agârșii
Ntreglu suflitŭ ńi-easti pliguitŭ
Di eramu tu soț, nai ma vrutŭ di tuț
Ńi-azbura și-di lumea di pirmithŭ

Haidi giońi Armâńi inșiț tu lumi,
Di la voi s-avdzâmŭ daima lucri buni,
Vini oara s-grimu: “Dișteaptâ-ti Armâne!”
Și s-nu minduimŭ, mași la dzuua di mâni.

Giońi Armâńi, tiniri vlâstari,
Ti voi nu-ari greu anda-i alumtari
Di la voi, armânamea așteaptâ
Mușatâ numâ sâ-ľi daț, câ-i mileti aleaptâ.

S-nu agrșiț câ voi hiț hasta frândzâ vlahâ
Si-pi-tu lumi s-purtaț fara armâneascâ
Armânescul zbor ma nâpoi s-nu armâna
Și-deadunŭ pi-a lui torŭ, miletea Armânâ.

La mărli sculii mintea voastrâ s-hibâ
Și anŭ di anŭ s-avdzâmŭ c-anvițaț s-amintâ
Di tutŭ nai ma-n susŭ s-vreț armâneasca numâ
Și-pirifańi s-purtaț hlambura Armânâ.

Bati cuclu, bati more batŭ ș-puľi pi-tu nuț
Deadi iarba, deadi more ies armâńiľi tuț.

Un câti un s-ti ľea haraua
Si-ľi zilipseascâ more tutâ duńeaua.

Deadi iarba, deadi more deadi ș-tindilina
Ies fumeili mșati more di Samarina.

Mușaț munțâ pascu more primuveara oili
Ies fumeili și-grescu more tâși di Perivoli.

Cantâ armâńiľi canta more cupiili suntŭ multi
Cantâ armâńiľi canta more bana lor di-tu munti.

Ńi-aveam un dorŭ di hoarâ,
Di munțiľi lăi di fagŭ,
S-mi videam nica nâ oarâ
Pitŭ pâduri, ca ńicŭ s-alagŭ.

Nâ dzuuâ oara vini
Di mi vidzui aclo,
Di plândzea soia cu mini,
Lâcrâmamŭ și-io di caimo.

Iar hoara giumitati,
Pustâ-ńi si pârea:
Casili tuti surpati,
Nicuchirľi-a lor câfta.

Ni-arcamŭ ocľi nafoarâ
Di acasâ di la noi
Dzenurli di pisti hoarâ
Suschira cupii di oi.

Zboarâ: George M. Merca

Tu albi, și-cu palasca-n bârnu,
Câciula ńi-u amŭ pi frâmti,
Io di zâmani ńi-escu Armânŭ
Io picurarŭ di munte.

Tâmbarea ńi-easti casa-a meauâ,
Cupia ńi-amŭ fumeaľea,
Tilefi bana-ńi dau trâ ea
Și ea-ńi da banâ-ańia.

Am câńi cu percea di aslanŭ
Hârnits cu dzăr și lapte
Tse ńi-au tutiputa ngâtanŭ
Și-alatrâ dzuuâ ș-noapti.

Când dormu și sum chin mi-aruc,
Nu-și mutâ eľi câștiga,
Cu ocľi patru-atumțea-aducŭ
Cupia-ńi deanvârliga.

Cu aesti multi oi mușati
Tricurâ-a meali ńeati.

Zboarâ: George Murnu (țivicusiti/adaptati)

Ńi-aducu aminti cându ședŭ
Di hoara mea mușatâ
Di hoara iu io ńica-ńi fui
Di hoara iu-ńi criscui,

Lea Sinoe, hoara mea,
La tini-ńi criscui mari,
La tini-avui cripări și-ghineți
Cumŭ cathi om ma și-ari.

Dumânițli anda inșeamu
Cu featili și-cu ficiorľi,
Noi un cor mari n-acâțamŭ
Guicamŭ tu misihori,

Aușľi mardzina di corŭ
Șideau și-fâțeau muabeti,
Vruti și ni-vruti și-azbura
C-ași și-aveau tu adeti,

Lea Sinoe hoara mea
Di tuti s-ai s-hii ghini,
Mini dorlu anda mi ľea
Mi tornu și pi la tini.

Șopatŭ, șopatŭ apâ-arați
Candu beai dorlu țâ treați.

Șur-șur, șopat șulinarŭ
Urdinâ armańiľi chindinarŭ!

Șopatŭ, apâ hrisusitâ
Cupańia-ți mâlâmâsitâ.

Poartâ armańiľi cu harauâ
Apâ di la piștireauâ.

Featili cu cubilița
Nveastili umplu buchița.

Chipuricilu tutŭ ma bati
Trecŭ cupii, cupii di stearpi.

Zboarâ: Gică Godi

Noi himŭ Armâńi, Armâńi di vâr’ chiro
Și- Armâńi va s-armânem di-aua și-nclo
Noi limba noastrâ nu-agârșim
Nu nâ-i arșini s-u azburâm
Di ațeľi ți fugŭ di ea nâ pizuim.

– O lăi papŭ, io voi s-ti antrebŭ țiva:
Tu Pindu armânamea cumŭ bâna?
Ficiorľi cându s-isusea
Featili nu li cunuștea,
Nu-știu ma s-iara ma ghini ași.

Ma paplu dzâsi oi-bo-bo
Va nâ chiarâ lele Dumnidză
Di ahâti arali pi-tu lao
Nu si-ari avdzâtâ vâr chiro
Mea ti bânai ta-s vedŭ mârat di io.

Zboarâ: Iancu Traian (țivicusiti/adaptati)

Ia cum vini eta,
Eta ațeauâ șcreta
Armâńiľi tuț di n-arâsprândimŭ.

Armâńi di-tu Armânii și di-tu xinitii,
Canâ oarâ deadunŭ nu va-s himu.

Armâńi di-tu Armânii și di-tu xinitii,
Noi Armâńi di daima fraț nâ himŭ.

Un zborŭ n-azburâmŭ,
Un strańi nâ purtamŭ
Inyiu lucru va s-lu minduimŭ.

S-himŭ deadunŭ nu s-poati,
Și mași ta-s nâ hârsimŭ,
Haidi tuț un cânticŭ s-ahurhimŭ.

Ascultați-mi ficiori-și feati
Un zborŭ io ma va vâ spunŭ
S-nu v-ampârțâț di isnafi
Vrem tuț s-himŭ deadunŭ.

Voi Armańiľi di pi-tu hoari
Tu xeani cara s-fudziți
Tuti cantițli armanești
Voi s-nu li-agârșiți.

Feati armâni, s-țâneț minti
Cu Armańi ficiori di v-adunaț
Armâneaști s-azburâț voi
S-nu v-arușunaț.

Câ mi-arupșiu di-a mea hoarâ
Nu a-stipsescu cu țiva,
Di la mini zborŭ nu a-s chearâ,
Zborŭ di limba mea.

Pi-tu hoari, pi-tu câsâbadz
Iuțido iu voi va-s hiț
Pârinteasca dimandari
Voi s-nu u-agârșit.

Ti un lai dorŭ, ti unâ vreari,
Ńi-alâsai taifa și-ńi fudzii tru xeani,
Ti un lai dorŭ, ti unâ vreari,
Ńi-alâsai fara ș-fudzii di-tu armânami.

Armaname, armaname, tińisitŭ lao,
Tini n-alâsași a noauâ nai ma mșatŭ iho.

Ma ți lai dorŭ, ți pustâ vreari,
Îńi mi-alâsă gionli, lele mintea-ńi cheari,
Cheptulu ńi-u aranâ, inima-ńi frândzi,
Iu hii lea dadao? Yina sâ-ńi mi plândzi.

Ľea-mi lăi doamne si adu-ńi-mi acasâ
S-vedŭ armânamea ș-taifa-ńi mâratâ.
Ľea-mi lăi doamne si adu-ńi-mi acasâ
S-vedŭ armânamea ș-taifa-ńi mâratâ.

Un cânticŭ ca di jali cântam nâ oarâ io,
Și dipuneamŭ tru vali di pi-un lai munti greu.
Și valea-ńi turna grailu cu șcľimuri, suschirosŭ,
Di arâsuna tutŭ plailu, și muntili jilosŭ.

Iu hiț bre giońi cu anami, fumeľi di fârșiroț
Iu ești Armâname, cu grâmusteańi, cu tutŭ?
Arâmasira cârărli ca pondi fâr di voi,
Și-s dusirâ fâlcărli cu turmili di oi.

Di la cașeri fluiara, ma nu s-avdi pi-tu munț,
Ni pravdâ ta s-azghearâ, și-di jali himŭ pitrumț.
Masi boațea ali lupoani ți s-avdi aclo tru munț
Ca nâ cândilâ-apreasâ inșitâ di-tu murminț.

Di Pilistera și-pân’ la Pindu
S-dișteaptâ armânlu di pumoarâ
Câmbăńi arâsunâ apirindu
Ti Paști ș-ti primuvearâ.

Luțeaști fața ca di soari,
Si-ambeatâ mintea di harauâ
Și treamburâ ciudii mari,
Tu vimtu hlambura-ațea noauâ.

Ieși-ńi tu migdani vrutâ-ńi soie,
Ta si-s cutreamurâ dușmańiľi
Di-a tali armi, di-a ta boe,
Și di-a tăi ficiori, giońi ca aslańi.

Duri fusi huzmichearâ șcretâ,
Di agiumsisi oarba a ta dusmanâ,
Duri alumtari dâdesi nâ eta,
Sudori, giunaticŭ, sândzâ, banâ!

Duri-ți furarâ avearli-a tali
Și inima ți-u dipirarâ
Mi curmâ a tau niho di jali
Ți-ascundi arșinea ta amarâ.

Vâzuia fluiara di harauâ,
Noaptea tricu, soarli deadi,
Si-analțâ hlambura ta noaua,
Câ lumea iara ińi ti veadi.

Pârinteasca dimândari
Nâ sprigiurâ cu focŭ mari,
Fraț di mumâ și di-un tarâ,
Noi, Armâńi di eta toatâ.

Di sumŭ plocili di murminți
Strigâ-a noșți buńi pârinți:
“Blâstemŭ mari si-aibâ-n casâ
Cari di limba-a lui si-alasâ!”

Cari-și lasâ limba lui
S-lu ardâ pira focului,
Si s-dirinâ yiu pri locŭ,
Si-ľi si frigâ limba-n focŭ.

Elu in vatra-ľi pârinteascâ
Fumeaľea s-nu-și hârâseascâ
Di fumeľi câruńi s-nu bași,
Natŭ în leagănŭ si nu-nfasi.

Cari fudzi di-a lui mumâ
Și di pârinteasca-ľi numâ,
Fugâ-ľi dhoara Domnlului
Și dulțeamea-a somnului!

N-asprândimŭ tu tutâ lumea
Steaua noastâ, ta s-ti-aflămŭ
N-ampârțâmŭ di soi și-locuri
Ș-fâr’ di tini nâ turnâmŭ!

Cara s-armâneamŭ-n hoarâ
Naca ńilâ va ți fâțeai
Ș-pisti noi, ‘țeľi fârâ steauâ,
Naca va s-anyiliceai?

Di câtŭ ti câftâmŭ ma multu,
Steauâ, luńina ț-u cheri,
Di-agiumsimŭ ta s-nâ hârsimŭ
Cu luńina di la țeri!

Nu va ti-aflâmŭ vârnâoarâ
Pânâ nu va s-anvițâmŭ
Câ steaua easti tu noi:
Mași aradzâli s-ľi-adnâmŭ!