George Murnu
(1868 – 1957) George Murnu s-feați tu Yinar 1868, tu hoara Brazi, ningă Veria (Gărții). Criscu tu Veria, câsâbă mari și avdzât, nvârligat di hori armâneaști: Marușa, Seľea di Nsus, Seľea di Nghios, Xirolivadi… locuri mușati, mplini di istorii și mitoloyii – di diparti s-ved chipitili a Olimpului – locuri ți va s-armână daimâ tu mintea-a poetlui și va s-hibâ cântati tu poeziili a lui. Poetlu ahurhi s-nveață carti Veria, deapoaia s-dusi la liceulu di Bituli. Feați studii universitari București, Budapesta și Minhen. Agiundzi profesor la catedra di Arheoloyii a Universitatiľei di București și, ma amânat, membru tu Academia Română. George Murnu ncľisi ocľiľi București, tu 17 di Brumar, 1957.
